نوار ة نجم تقول ….. لا اتحبسنا ولا اتعذبنا

تحديث

الجزء الاول هنا من كلام المدونين على الجايكو
ومن عند نوارة
ومحمد الغزالى
ومدونات اخرى

الجزء التانى وفية كل ماحدث بالقسم من عند نوارة
اهه

اما اكمل لكوا قبل ما انزل تاني

تابعوة هناك

علشان التعليقات




لا اتحبسنا ولا اتعذبنا

زعيمة وشيخة المهيسيين

شفتوا كتبت وردت علشان تهدى مجتمع المدونين من دموعها الغالية

لانها تبكى علطول

لاكن ضباط القسم مفروض مش كده

كان ممكن الموقف يعدى لو مطولتوش فييه

نص ماكتبتة نوارة


الموضوع وما فيه اني زعلت على كرامتي، سايقة جنب النيل هيلتون من ناحية المتحف والمطبات جبال لقيت شخص ما لابس كحلى وبيريه كحلي وواقف في الكشك بتاع الامن ده اللي جنب الجراج بتاع النيل هيلتون باقول له بابتسامة: المطبات عالية قوي
واذ بي اوفوجأ انه بيكلمني كأنه ظبطني في اثناء الاعداد للجريمة واحبط المخطط يافندم: عشان اللي بيفجروا المتاحف ماهو كلهم بيلبسوا زيك كده (وراح مشاور على الحجاب) انا طبعا في الاول ما صدقتش قلت ينكن بيهزر فاوسعت الابتسامة: ح ابقى اخد بالي وانا بافجر المرة الجاية قام بمنتهى العجرفة قال لي: ما انا عرفت عربيتك خلاص
الشهادة لله انا زعلت على روحي قوي حودت شمال عشان اطلع على الكورنيش لقيت واحد تاني لابس كحلي وبيريه بس عنده شرط على كتفه قلت له: فيه واحد قدام الفندق قال لي كذا كذا قوم يقول لي: لا مش كل المحجبات كده يعني
قلت له: انا على فكرة صحفية ومش ح اسكت وح اكتب في الموضوع ده يعني ما اعرفش امشي في بلدي، معدية اقوم اتهان ده انا لو كنت في اوروبا وللا امريكا يبقى دي اسمها عبارات عنصرية وكنت اشتكيته فقال لي: لااا هو قال لك ايه يعني
قوم انا فجأة لقيت الدموع نازلة لوحدها
احمد مهنا كلمني يبارك لي على الكتاب لقاني باعيط فقال لي طب خليكي مكانك انا جاي لك
جالي احمد مهنا ومحمد غزالي وقالوا لي ح نعمل محضر بالواقعة
مها سكوت ح نصوت كلمتني في التليفون وقالت لي: ما تروحيش يا نوارة القسم ح تعطلي نفسك وتوجعي دماغك على الفاضي
مش اسمع الكلام بقى؟ لا محمد الغزالي قال لي: لازم نثبت حقنا هو انتوا ما تلبسوش حجاب يتحرشوا بيكوا ويقولوا لكوا تستاهلوا تلبسوا حجاب تبقوا ارهابيين؟ طب تعملوا ايه يعني؟ مش ح تعرفوا تمشوا في البلد؟
وطبعا بما اني مؤمنة بالقانون وسيادة القانون فضلت قاعدة في قسم قصر النيل من الساعة خمسة لتمانية ونص، تروح الناس وتيجي الناس يعملوا محاضر ويمشوا لدرجة ان فيه واحد عمل محضر بقتل مراته ومشي واحنا لسة قاعدين
– ايه الحكاية؟
الحكاية كذا كذا
الامين يبص لي باندهاش ويقول لي: طيب طيب…الباشا ح يغسل ايده بس ويشوفكوا اصله كان بيتغدا
الشهادة لله المعاملة ما كانش فيها اي قلة ذوق خالص لحد قبل الاخر، قبل الاخر ح اقول لكوا ايه اللي حصل،
الباشا يقول لي ايه الحكاية اقول له…يتنح شوية وبعدين يقول لي: هو انت ح تعملي عقلك بعقل واحد خريج ابتدائية؟ ما اخدتهاش ليه بروح الدعابة؟ عموما ح اعمل لك محضر
انسحبت من لساني وقلت له: يا فندم انا بادفع ضرايب وهو بياخد مرتبه من ضرايبي مش عشان يهزأني وانا ماشية في الشارع
الظابط: الاربعين جنيه؟
انا: طب يعني هو خواجة؟ مالوش ام وللا اخت وللا خالة لابسة زيي؟
الظابط: طب ح اشوف لك حد يعمل لك المحضر!
يبدو والله اعلم انه لقى فيا مادة خصبة عشان ينادي كل الناس تيجي تبص عليا انا والاتنين اللي معايا اللي بقوا بعد كده اربعة
لان محمد مفيد جه ومعاه مصور صحفي، ومحمد مفيد عنده لا مؤاخذة دقن راحوا على الباب شافوا بطاقته وموبايله
بعد شوية جه ملازم كده بص لي وكل شوية واحد يدخل ماسك في ايده ورق قال يعني ح يعمل المحضر عشان يسألني فيه ايه عشان يضحك الظاهر وللا ايه؟ وانا راخرة قعدت اقول كلام بتاع الضرايب والاهانة ولو كنت في بلد تانية كانت بقت عبارة عنصرية، هو محمد غزالي حاول يغلوش على كلامي شوية عشان يقتصد في ضحكهم عليا وهم يقولوا: مافيش ظابط بيلبس كحلي
قلت له ايا كان حتى لو بياع ترمس ده واحد اهاني في الشارع وانا عايزة اشتكيه
ورايحين جايين، الظابط وصحابه اللي ناداهم، يتكلموا في التليفون: يافندم بتقول انها صحفية وعايزة تشتكي ظابط
وبعدين الظابط ابو تلات نجوم قال لي ح ابعت معاكي حد يعاين مكان الواقعة! بس هو ح ييجي من قسم الجزيرة
هم العيال قالوا لي هو بيحاول يعطلك يعني جايب واحد من قسم الجزيرة ليه؟ بس انا حاسة انه كان بيجيب صحابه يتفرجوا عليا
جه ظابط ما شفتش النجوم على كتفه وتقريبا ميت على روحه من الضحك ومحمد مفيد بيحاول يقنعه اننا عايزين يبقى لنا كرامة وهو يضحك اكتر ومحمد مفيد يقول له يعني وانا داخل القسم ليه يتشاف بطاقتي وموبايلي دونا عن كل الناس عشان مربي دقني والراجل برضه مش فاهم ايه الحكاية ويضحك تاني وبعدين راح معانا لموقع الحدث
اني الاقي اي حاجة كحلي هناك
كل اللي موجودين امناء شرطة وعساكري وكلهم شكلهم كانوا مستنيينا عمالين يبصوا لنا ويزغدوا بعض
انا لازم انزل دلوقت حالا ح اكمل لكوا الحكاية لما ارجع ان شاء الله واقول لكوا على مفاجأة مش ح تصدقوها

شفتم اخلاق اكتر من كده ولسه

ياريت تقرأوا كمان ده

عنصرية ضد المحجبات….لييه بقى كدة..وحظك يجى مع نوارة

لسه ياحبيبى الصور بتتمنتتج

الموضوع بالصور من عند الغزالى

معلهش سامحنا يامحمد



السعاتى ونوارة

مفيد يتحدث مع نوارة

نوارة فى القسم ,,


مهنى والسعاتى ونوارة


فى انتظار جودو ..المامور

لسة برضة

عشت طوال حياتى الفتره الفائتة معتقدا بشكل او باخر ان تبرج المراة من اسباب التحرش بها..الا ان اليوم اثبتت النظرية اننا شعب يتحرش بنفسة اساسا..
*****
البدايه ..مكالمة من احمد مهنى.. _اية يا ابنى انت فين
فى بيتنا لية
نوارة نجم ..فى مشكلة فى وسط البلد .
_طيب انا لابس ونازل
سلام
***************************
_الو ..ايوة يا نوارة فى اية ..بتشنج ..ايوة يا غزالى ..فى ظابط اتريق عليا عشان الحجاب.._نعم ..دة فين دة وهو اية علاقتة اصلا_فى الشارع الى جمب الهيلتون..
_طيب خليكى مكانك انا جاى

******************************
فى الطريق فكرت اكلم مين..كل الاخوة الاصدقاء ظباط الشرطة قالولى انى اروح اكلمة بالادب واخلية يعتذر..يعتذر وادب..مش عارف..
روحت مكلم ..”اسر” خدت منها رقم المحامى بتاعها..المحامى بتاع نهى رشدى برضة….
_الو ايوة يا استاذنا …مع حضرتك محمد الغزالى مدون وكاتب ووو كنت عايز راى حضرتك فى موضوع
_اتفضل.
_نوارة فى حد اتعرضلها عند المتحف و
_لا لو سمحت بالتفاصيل..
_دقيقة واخليها تكلمك..
نوارة خدت التليفون وكلمتة ونصحها بنفس النصيحة ..اننا نعمل محضرين الاول فى قسم شرطة قصر النيل والتانى فى الوزارة..
داخل القسم الامين الى برة بيسالنا رايحين فين..
فبقولة داخلين جوة يا ابنى
بيقولى حضرتك ظابط..قولتلة لا مواطن داخل اعمل بلاغ.. وقولت لمهنى بضحك ..البالطو عامل شغل..المهم روحنا قعدنا مستنين لحد منا الباشا خلص غداء وبعدين دخلنا ها يا باشا ..اتفضلو ..بداتنوارة تحكى بالتفصيل الحكاية الى هاتحكيها بعد كدة يجيى 30 مرة مثلا ..حصل اية

حصل انها وهى خارجة من منفذ جامعة الدول..المنفذ اسمة كدة..على ميدان التحرير كان على شمالها ظهر النيل هيلتون والمتحف..المطبات هناك عالية اوى….فبتكلم راجل فى الكشك قالتلة بالنص الى حفظتة ..
_المطبات هنا عالية اوى لية كدة..هاتبوظ العربية..
_علشان الارهابين الى يفجرو المتحف ميلحقوش يهربو…
_ارهابين اية بعد الشر ربنا يستر
_والله يا انسة مش بعيد هما كلهم بيبقو لابسين زيك كدة..
واشار بايدة على الحجاب
فردت..بذهول
_المرة الجاية متبقاش تعدينى..

_لا على اية انا حفظت رقم عربيتك وشكلها…
هنا بداء الانهيار…فطبعا الاخت اكمنها طيبة واصيلة..راحت رايحة للى بعدة تشتكى..

_على فكرة زميلك الى فى الكشك الى هناك قالى (الحوار السابق) وانا صحفية ومش هاسكت
_لا يا هانم هو ميقصدش..مش كل المحجبات ارهابيين برضة..!!

بس الضابط الى بيكتب المحضر حب يهدى الجو..فتكلمت انا

– بص حضرتك احنا صحفيين وقولنا قبل ما نطلع على الجرايد نكتب الكلام دة نيجى نشتكى الاول فى البلد مش فى قانون برضة..فبهت اخونا

قالها معاكى كارنية النقابة..قالتلة اه والبطاقة.. رد الاخ ..لا انا عايز كارنية النقابة..راحت مديالة كارنية الاتحاد بتاع الاذاعة والتليفزيون..

وراح خارج برة..واتاخر..فانا قولت اخرج اشوف الجو..لقيت الباشا واقف بيميلى البينات عبر الموبايل..ويا باشا كيت كيت كطيت..ومعاه موبايل تانى لسة هاشوف فى اية .طلعلى عسكرى ظريف

_خير يا باشا

_الحمام منين..

اخر الطرقة شمال

شكرا

اخرج لاجدة مستمر فى المكالمة ..ويطوى ورقة المحضر الذى كتبة..ويستدعى ظابط من قسم الجزيرة…فى الوقت دة مفيد جة وجة احمد الساعاتي

ولد صغير وتانى مرة اشوفة بس جدع..المهم الاخوة فى القسم اول ما مفيد دخل القسم قالولوة انت رايح فين..علشان دقنة ..وقالولة اقفل موبايلك..قام قالهم وانت جاى هنا لية اصلا…
قالهم انا داخل لزميل ليا بيعمل محضر…وطبعا مفيد جة فالحوار اتعاد من الاول…فالظابط كان عايز يتكلم ودى تانى..

قولتلة فى ناس زمايلنا فى جرايد جايين..دة يضايق حضرتك..قالى لا ويشربو الشاى كمان بس على حسابك..

شوية وجة الضابط الى من قسم الجزيرة..

وروحو معاة بقى..ركبنا مع نوارة العربية..والباشا جة ورانا فى البوكس..عارف لما تروح منطقة…تحس انها مستعدة لاستقبالك..

باب المنفذ الى علطول مقفول وفى ظابط واقف عندة بيبص على رخصك مفتوح ومفيش ولا ظابط موجود كل الموجودين عساكر

الظابط الى معانا نزل بص ..الكشك يا ولادة فاضى خالص..طيب تفتكر مين دة..

قالنا ..يمكن يطلع مسيحى فى الاخر

قولتلة مقلنا كدة…

رجع تانى قالك لا مفيش ظابط ممكن يقول كدة ..دة اكيد عسكرى الى بيبلسو كدة الكلابة ..وبتوع دوريات الشرطة الراكبة..والمرور ..مع ان بعد كدة اتقال مفيش حد بيليس كدة فى الشرطة اصلا…المهم روحنا قعدنا ندو ر..سالت امين شرطة انا ومفيد قالنا الدوريات الى هنا بتخلص 8..بس مفيش دوريات دلوقتىوجة الظابط وروحنا القسم تانى لقيت وجة يصعب ان ينساة اى حد ( الضابط سموأل ابو سحلة)..تنحت انا ومفيد ..مفيد بيقولى عارف مين دة..قولتلة وهل يخفى ابو سحلة..قعد يقنعنا بانة اكيد مختل او مش ظابط اصلا واكيد عسكرى ..او مش عسكرى كمان دة حد من حرس المتحف او من شركة امن..قولتلة ..بص حضرتك
_احنا عايزيزن نعمل محضر فى بلدنا وفى القسم التابع لية الواقعة هل دة ممكن..
_سكت وقالى.؟.ممكن تستنو برة كلكم..جت نوارة تقوم قالها خليكى هنا..وسالها مين ابو جاكت اسود دة قالتلة ابن خالتى قعد يقنعها تتنازل ..وانا خرجت قدت اتصل بيها على الموبايل علشان ما تتنازلش..فى الاخر دخلنا قعدنا تانى والمحضر اتكتب..وانا قاعد مع نوارة ..حاولت اصور الظابط قالى انا مرضيتش اخدة منك احتراما لمنصبك…
قولت اشطة كلهم فاكرنى ظابط او حد مهم او محامى علشان بتكلم بالقطارة ..وقف مفيد ومهنى والسعاتى مع اخويا ابو سحلة..وانا جوة مع نوارة بنكتب المحضر..وكل شوية نختلف ..ياعم اكتب لابس كذا..لا دة مش لبس ظباط..ومفيش ظابط هايعمل كدة..ماشى مش ظابط واحد
لابس كيت كيت وواقف فى المكان الفلانى والساعة الفلانية..انا عايز محضر..فدخل ابو سحلة هو والشباب قالى وبعدين طيب
بصيت فى عينية.
وقولتلة وبعدين هاجيبة..النهاردة..بكرة بعد بكرة بعد شهر بعد سنة..بعد 10 سنين اكيد هاينزل المتحف تانى..وساعتها هاجيبة واعرف اسمة وساعتها يبقى المحضر اثبات لحقى…
قالى يا ابو حميد..يعنى انا عارفك وعارف اسمك وهاجيبك…بلاش الكلام دة.
المحضر خلص..ممكن نمشى بقى..قالك لا المامور لازم يشوفكم ..طلعت برة لقيت المامور والنائب موجودين اصلا..قولت للسعاتى فى اية..
قالى كدة بتتلفق…
نوارة بدات تنهار بقى..عاليزة اروح..عايزة امشى ..قالها لا دة محضر كبير وبداء بتلذذ فى قراءة المحضر قطعة قطعة وسطر سطر
والبنت قدامة بتقولة عايز اروح ماما ظغطها عالى وعايزة اشوفها لو سمحت… ولا حياة لمن تنادى..فى الاخر بداء يزعق..مفيد قالة لو سمحت حضرتك متعليش صوتك..قالة يا استاذ انا بعمل شغلى..فمفيد رد بجراءة وانا لما بعمل شغلى مش بزعق لحد..راح الظابط قالة انت مش جة اختصام كلكم تخرجو برة…فانا قولتلة انا ابن خالتها ومش خارج..قالى انت ممكن تفضل جدعنة يعنى..قولتلة شكرا ..يدوم الذوق..شوية تانى ودخل الظابط وقالنا ممكن تخشو للمامور ودخل معنا ابو سحلة وهناك المامور قرى الكلام تانى..ووعدنا بالتصرف..المامور..(هانى جرجس )مامور قسم قصر النيل..وخد رقم تليفونى ..علشان انا ابن خالتها بقى ..
ولسة عايز يعدل فى المحضر ..قولتلة ممكن نمشى بعد كدة قالى اه…قولت لنوارة بتعرفى تجرى..قالتلى اه..قولتلها طيران على تحت..وركبنا العربية ونزلنا الشباب فى التحرير وانا روحتها البيت وبعد كدة روحت…تحيا مصر يا جدعان

دة رقم المحضر …886 أداري قسم قصر النيل المحضر على ورقتين موقعة عليهم نوارة برقم بطاقتها…
ملحوظة
مع كل الاسهاب الى حكيت بيه دة انا كدة بحكى باختصار مخل تخيل انت بقى 5 سعات فى القسم بنتكلم ونتكلم ونتكلم

وفى الاخر محدش مروح غير لما المامور يشوفكم وفى الاخر المامور طلع فى القسم اصلا..وللحق احنا مضربناش ولا اتعذبنا ولا حد شتمنا باهلنا..ولا اى حاجة من دة حصل……

راجع ايضا

أبو سحلي والدوسية الاخضر

أبو سحلي في مكان الحريق

ابو سحلي وناصر نوري

هل تعرف اسم هذا الضابط؟

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s